ஆர்வத்தின் விழுக்காடு

- துவாரகை தலைவன்

அறியாமை தோள் துண்டின் கீழே
புதிதாய் அறிமுகமாகும் இரு கரங்கள்.
விரல்கள் துழாவி
சுயமரியாதை நசுங்கிச் சாக
நடக்கும் வியாபாரம்.

நாட்கள் சில சென்றாலும்
கைகளில் இன்னும் மணக்கும்
புதிய நோட்டுகள்.

தொட்டால் நொறுங்கி விழும்
மலிவான எண்ணங்களைக்
காட்டிச் சிரிக்கும்
துளைகள் விழுந்த
வீட்டுக் கூரை.
எங்கோ ஒரு மூலையில்
இன்னும் சிறிது ஒட்டிக் கொண்டிருக்கும்
விவஸ்தையாய் கூரையில்
செருகி வைக்கப்பட்ட
கோழியிறகு
காதைக் குடைந்து
தூக்கி யெறிய
குப்பையோடு சேரும்.

காத்திருந்த நாளும் வர
முன்னமே எற்பட்ட
வலுவான நல்லுறவின் அடையாளமாய்
குஷ்டரோகியின் துணி மூடிய கையில்
விரல்கள் இருப்பதாய்
கற்பனை கைகுலுக்கும்.
அக்கரம் பற்றி
குனிந்து இட்ட முத்தமானது
ஓட்டு இயந்திரத்தின் பொத்தான் மேல்
சுட்டு விரலி னழுத்தம்.

கட்டுகளைத் தாண்டி கொட்டுகிறது
வாக்காளர் ஆர்வம்.